SIMPLE MINDS со “Greatest Hits and more, live – 2014 tour” во СКОПЈЕ!!!

Со големо задоволство сакаме да Ве информираме дека после година и половина од големиот концерт на Duran Duran, Авалон Продукција ги враќа големите концерти во Македонија.

Легендарните Simple Minds, својата две годишна светска “Greatest Hits” - турнеја, после настапите во O2 Арена- Лондон, Манчестер Ман арена - Манчестер, Зенит - Париз, Хајнекен мјузик хол - Амстердам и др. ја завршуваат во Македонија, на 5ти Март со концерт во комплетно реновираниот СРЦ "Кале".

Најуспешниот Шкотски рок бенд на сите времиња Simple Minds, во Скопје доаѓаат во постава: JIM KERR - вокал, CHARLIE BURCHILL - гитара и клавијатури, MEL GAYNOR - бубњеви,ANDY GILLESPIE - клавијатури, GED GRIMES - бас гитара и SARAH BROWN - пратечки вокал.

Како што веќе споменавме сет листата на оваа турнеја е составена од сите најдобри хитови на Simple Minds, како: ”Don’t You (forget about me)”, "Promised You A Miracle", ”Waterfront”, ”Alive and Kicking”, "Glittering Prize", "All The Things She Said", "Sanctify Yourself", "Someone Somewhere (In Summertime)", "Ghost Dancing", ”Kick It In", "She's A River", "Mandela Day”, "Beafast Child”  и многу други.

Во својата долгогодишна кариера, Simple Minds имаат издадено 16 студиски албуми, кои со својата продажба, имаат достигнато мултиплатинест тираж.

Како специјални гости, вечерта ќе ја отворат со едночасовен настап Мизар, еден од нашите најдобри бендови на сите времиња.

Официјална изјава Горазд Чаповски-Мизар: “Ми представува огромно задоволство да свириме со Simple Minds, израснав со нивната музика, ги имав сите нивни албуми и учев од нив. Тој настан ќе биде и добар повод  да го представиме новиот албум на Мизар”

Simple Minds доаѓаат во Скопје, со сопствена голема продукција (звук и светло), концертот се преместува еден ден подоцна на 6ти Март!

Почитувани Авалон продукција заедно со менаџментот на Simple Minds информира:

"На наше инсистирање иако турнејата беше предходно заклучена со последниот концерт во Полска, Simple Minds ја продолжија со два концерти во Загреб и Скопје. Исто така на наше инсистирање прифатија, својата комплетна продукција (звук и светло), од Полска да ја носат и на балканот, со што публиката во Загреб и Скопје ќе  добие комплет ”Simple Minds live experience”, кое може да видите како изгледа на следниот линк http://www.youtube.com/watch?v=SqtxbPcKbJo

Поради фактот што постои голема веројатност, дека во Март може да има сеуште зимски услови, што би го успорило патувањето на големата продукција (неколку камиони), заедно со менаџментот  на Simple Minds, одлучивме помеѓу концертите во Загреб и Скопје да има еден ден пауза, со што би ја исклучиле можноста да има каснење на камионите со опрема. Поради сето ова концертот во Скопје е презакажан за еден ден покасно, на 6ти Март. Оваа измена ќе биде официјално поставена и на сајтот на Simple Minds."

ВАЖНО: Влезниците што ќе се продаваат од утре (понеделник) ќе бидат со новиот датум 6ти март, а оние кои што до сега купиле влезници со датум 5ти март, НЕ МОРА ДА ГИ МЕНУВААТ, ќе важат истите влезници!